MANOMA 5802 NE SUKA SAMU RANCEN NOMAN SHINKAFA A JIHAR FILATO

0
31

 

Isah Ahmed, Jos

SAKATAREN kungiyar manoman shinkafa ta jihar Filato, Dauda Aku ya bayyana cewa manoman shinkafa na jihar Filato  mutum 5802 ne aka rabawa rancen kayayyakin aikin  noman shinkafa, da suka hada da taki da irin shinkafa da injinan ban ruwa da magungunan kashe ciyawa da qwari a karqashin shirin bayar na rancen noma na Anchor Borrowers na babban bankin Nijeriya a ‘yan kwanakin nan.

Dauda Aku ya bayyana haka ne a lokacin da yake zantawa da wakilinmu a garin Jos, fadar gwamnatin jihar Filato.

Ya ce a  wannan rance babu maganar bayar  kudi, sai dai wadannan kayayyaki da aka baiwa manoman, kuma  za a biya shi ne a cikin watanni 12. Wato  idan manomi ya yi noman damina zai biya kashi  30,  idan ya yi  noman  rani  zai  biya kashi 30, idan kuma ya sake noman damina zai biya kashi 40. Kuma da shinkafar da manomi ya noma ne, zai biya wannan rance.

Ya ce wannan aiki na bayar da rancen kayayyakin  noman shinkafa da aka baiwa manoman  jihar ta Filato, da babban   babban bankin Nijeriya ya bayar  ta hanyar bankin Unity da kungiyar  manoman shinkafar. Tun da farko sai da  suka bi suka yi rigistar duk wani manomin shinkafa  suka karbi nambar banki ta BVN,   na kowanne manomi suka dauki hoton ‘yan yatsu da lambar wayar. Kuma suka je suka gwada gonakin manoman da   daukar hotinan su,  daga nan aka kawo kayayyakin  aka raba masu.

‘’Babu shakka wannan shiri na bayar da rancen kayayyakin aikin noman shinkafa  da gwamnatin tarayya ta kirkiro   abu ne mai kyau, wanda zai bunkasa noman shinkafa a Nijeriya. Ta yadda  nan gaba kadan za a daina   shigo da shinkafa Nijeriya  daga qasashen waje’’.

Sakataren kungiyar manoman ya yi  kira ga gwamnati ta rika bayar da wannan rance tun kafin faduwar damina, domin manoma su rika cin gajiyar wannan shiri kamar yadda ya kamata.

 

Daga nan ya yi  kira ga manoman shinkafa  na ainihi a jihar Filato,  su yi kokari su zo suyi rigista da wannan kungiya, don cin gajiyar wannan shiri.

 

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.