SANATA HUNKUYI YA RABA BABURA DA KEKUNAN DINKI A KARAMAR HUKUMAR LERE

    0
    857
    Isah  Ahmed, Jos
    SANATA mai wakiltar mazabar zone 1 da ke Jihar Kaduna Sanata Sulaiman
    Usman Hunkuyi ya raba wa ‘yan siyasa baburan hawa da kekunan dinki da
    injinan ban ruwa a karamar hukumar Lere da ke mazabarsa.
    Da yake  jawabi a wajen raba wadannan kayayyaki, Sanata Sulaiman Usman
    Hunkuyi ya bayyana cewa baburan hawa guda 25 da kekunan dinki guda 45
    da injinan ban ruwa guda 45 da aka raba, an yi haka ne domin a
    tallafa wa jama’a su sami sana’o’in da za su rike kansu.
    Sanatan wanda daraktan yakin neman zabensa Honarabul Abubakar Umar
    Yariman Bomo ya wakilta ya yi bayanin cewa wannan rabon kayayyaki da
    aka yi kashi na farko ne. Ya ce nan gaba za a sake rabon kayayyakin
    kashi na biyu da kashi na uku.
    Ya yi kira ga wadanda suka sami wadannan kayayyaki su gode wa Allah
    kuma su yi amfani da su kamar yadda ya kamata.
    A nasa jawabin Ko’odinatan Sanatan a karamar hukumar Lere Murtala Sani
    Maskawa ya bayyana cewa kafin wannan rabon kayayyaki, Sanata Sulaiman
    Hunkuyi ya samar wa  ‘yan wannan karamar hukuma ta Lere mutum 4, aiki a
    gwamnatin tarayya.  kuma ya sanya an yi wa mutum  46 aikin tiyatar
    kaba tare da yi wa masu ciwon idanu aiki mutum  162.
    Har ila yau ya ce Sanatan ya dauki nauyin dalibai ‘yan wannan karamar
    hukuma 16 da suke karatun digiri a jami’o’i  har su gama karatunsu
    tare da yin wata babbar hanyar ruwa a hayin gada Saminaka da ke
    wannan karamar hukuma.
    Ya ce yanzu kuma Sanatan zai  yi babbar hanyar ruwa a sabon birni da
    garin Saminaka. Haka kuma za a ja wutar lantarki daga kwanar Narbi
    zuwa Juran kurama da Jurawa zuwa Gamagira tare da samar  injinan
    bayar da watur lantarki na taransifoma guda 5 da za a sanya a garuruwa
    daban-daban na karamar hukumar tare da aikin rijiyoyin tuka-tuka a
    garuruwan Kayarda, Tasha da Dokar Lere da Mariri da ke wannan karamar
    hukuma.

    LEAVE A REPLY

    Please enter your comment!
    Please enter your name here