Makarantarmu  Ta Asasul Islam Rikkos Jos Zata Zama Abin Koyi Ga Makarantunmu Na Najeriya-Muhammad Muhammad

0
677

 

Isah Ahmed, Jos

Daraktan sabuwar makarantar nan ta  Asasul Islam Model Private,  ta kungiyar Jama’atu Izalatil Bid’ah Wa’ikamatis Sunnah ta kasa  da ke unguwar Randar ruwa Rikkos a garin Jos babban birnin jihar Filato,

Ustaz Muhammad Muhammad Abubakar ya bayyana cewa bisa tsare tsaren da suka yiwa wannan makaranta, da yardar Allah zata zama abin koyi ga dukkan makarantun kungiyar dake ciki da wajen Najeriya. Ustaz Muhammad Muhammad Abubakar ya bayyana haka ne a lokacin da yake zantawa da wakilinmu.

Ya ce a wannan sabuwar  makaranta mai  azuzuwa  12 da ofisoshin gudanarwa da wani bawan Allah, Alhaji Abubakar Sulaiman ya gina, kuma ya baiwa wannan kungiya ta kasa,  suna son su gudanar da makarantar kananan yara da firamare da sakandire.

Har’ila yau ya ce    suna son da yamma su rika karantar da tarbiyar musulunci a wannan makaranta,  da sanin makamar harshen larabci da haddar Alkura’ani mai girma, da  mahimman abubuwa kan  addinin musulunci.

Hakazalika  ya ce zasu rika gabatar da karatun asabar da lahadi don matan aure da magidanta, da basu riga sun yi karatuttukan  addinin musulunci ba.

Ya ce  mutum ko ya yi karatun boko, yaje har jami’a ya yi digiri, akwai bukatar yazo ya yi karatun addini. Don haka  a wadannan ranaku na asabar da lahadi zasu rika karantar da matan aure da safe  kuma su karantar magidanta  da yamma.

‘’Abin  da ya karfafa mana  gwiwar kawo wadannan sababbin tsare tsare a wannan makaranta shi ne dama muna da irin wadannan makarantu na Asasul Islam a dukkan fadin Najeriya.

Don haka  ne muke son mu mai da wannan makaranta  ta musamman  da zamu inganta  harkokin koyarwa ta hanyar samar  da kayayyakin aiki irin na zamani, da koyar da ilmin kwanfuta da ilmin kimiyya da samo kwararun malamai don ganin daliban wannan makaranta sun sami  ingantatcen ilmi.  Domin mu nunawa sauran makarantunmu  a aikace aikacen da suka kamata su yi’’.

Ustaz Muhammad Muhammad ya yi bayanin cewa suna son suyi tafiya daidai da zamani, ta yadda  daliban da suka sami  shiga wannan makaranta, zasu rika  fita da abubuwan  da  ya kamata don  wucewa makarantun gaba kamar jami’o’i da sauran manyan makarantu batare da wata matsala ba.

Ya yi  kira ga al’umma su basu goyan baya da hadin kai, don su sami nasarar cimma  kudurori da suka sanya a gaba.

 

LEAVE A REPLY

Please enter your comment!
Please enter your name here