Zan Tashi Garin Gonin Gora Idan Matasan Su Ba Su Daina Tada Hatsaniya Ba — El-Rufa’i

0
483

Daga Usman Nasidi

Gwamnan jihar Kaduna Malam Nasiru El-Rufa’i ya ce zai tashi Gonin Gora dungurungun idan matasan garin suka ci gaba da tare mutane suna kashe su.

Garin na Gonin Gora yana kan hanyar Kaduna zuwa Abuja, kuma matasan garin sun sha tare matafiya suna kashe su da zar an soma rikici a birnin Kaduna.

Da yake jawabi a filin \”Hannu a Yawa\” na gidan rediyon tarayya na Kaduna, Gwamna El-Rufa’i ya ce \”ina ba mutanen Gonin Gora shawara cewa wannan abin da matasansu suke yi su daina idan ba haka ba wallahi tallahi zan tashi garin.\”

\”Ba za mu yarda su rika rufe hanya su hana mutane shiga ko fita daga gari suna kashe su ba. Za mu sa jami\’an tsaro su rika duba wurin amma idan ba su daina ba, garin da kan shi bai fi karfin gwamnati ba.\”

Gwamnan na Kaduna ya yi wannan jawabi ne daidai lokacin da gwamnatin jihar ta ce \’yan sanda sun cafke mutum 32 wadanda ake zargi da hannu a rikicin jihar.

Wata sanarwa da Samuel Aruwan, mai magana da yawun gwamnan jihar Malam Nasiru El­-Rufa’i ya aike wa manema labarai ta ce jami\’an tsaron sun dakile wani yunkuri na tayar da hankali a wuraren ibada da ke unguwannin Kawo da Hayin Banki da ke cikin birnin Kaduna.

Kazalika an sake kashe mutum daya a Kasuwan Magani kana aka kama wani mutum da tsakar dare dauke da bindiga, in ji sanarwar.

Mista Aruwan ya ce \”za a gudanar da bincike kan mutanen sannan a gurfanar da su gaban kuliya.\”

Gwamnatin jihar ta ce ta sassauta dokar hana zirga-zirga a yankin Kachia inda a ranar Asabar, 27 ga watan Oktoba za a bar mutane su fita har zuwa karfe biyar na yamma.

Kazalika daga ranar Lahadi za su fita daga karfe shida na safe zuwa biyar na yammaci a kullum.

Sanarwar ta kara da yin kira ga mazauna sauran sassan da aka sanya wa dokar hana zirga-zirga da su ci gaba da bai wa jami\’an tsaro hadin kai, tana mai gargadin masu jimirin tayar da kayar-baya da su kwana da sanin cewa idan suka fada hannun jami\’an tsaro za su dandansa kudarsu.

LEAVE A REPLY

Please enter your comment!
Please enter your name here