Makarantar  Karatun Alkura’ani Ta Madinatul Ahbab Da Ke Kwaftara Ta Yaye Dalibai 74

0
1344

Isah Ahmed Daga Jos

MAKARANTAR koyar da haddar karatun Alkur’ani mai girma ta Madinatul Ahbab da ke garin Kwaftara, kusa da garin Saminaka a Jihar Kaduna, ta yaye  daliban da suka sauke Alkura’ani mai girama 74  da  dalibai  9 da suka haddace Alkura’ani mai girma, a karshen makon da ya gabata.

Da yake jawabi a wajen taron Imam Hassan Aliyu Sese wanda  ya wakilci Sheikh Falalu Dan almajiri ya yabawa daliban, kan kokarin da suka yi, na sauke karatun Alkura’ani mai girma.

Ya yi kira ga daliban  su kara zage damtse don cigaba da neman ilmi. Ya ce karatu yanzu kuka  fara, don haka ku bada kokari ku cigaba da yin karatu.

Ya yi kira ga al’ummar musulmi su rike Alkura’ani su yi ta karantawa  kullum. Ya ce  a Aljannah daga Annabawa sai masu haddar Alkura’ani.

Shi ma a nasa jawabin Sheikh Nazifi Ibrahim Zariya cewa ya yi babu wata ni’ima a duniya, da ta kai ni’imar Al’kura’ani.

Ya ce falalar Allah ita ce addinin musulunci kuma ita ce littafin Al’qura’ani mai girma.

Ya ce bayan an sami karatun Al’kura’ani ba a zama, sai a cigaba da neman ilmin fassarar Al’kura’anin.

Tun da farko a nasa jawabin shugaban makarantar Alhaji Adamu Halilu Kwaftara ya bayyana cewa wannan bikin yaye dalibai shi ne karo na 28.

Ya ce  a bana sun yaye daliban da suka sauke Alkura’ani  guda 74 da daliban da suka  haddace Alkura’ani guda 9.

Alhaji Adamu ya yi bayanin cewa  daga lokacin da aka vude wannan makaranta, zuwa yanzu sun yaye daliban da suka haddace Alkura’ani mutum 56. Kuma sun yaye daliban da suka sauke  mutum 375.

Ya ce baya ga daliban da suke samu a wannan yanki, suna samun dalibai daga wurare daba daban musamman  Jihar Kaduna da jihohin Filato da Nasarawa da  Kano da  Bauchi  dai sauransu.

Yace babban abin da suka sanya a gaba shi ne gyara mazaunin wannan makaranta na dindin shekaru 10 da suka gabata.

‘’A duk shekara muna yin noma da kuma taimakon da jama’a suke bayarwa  muke amfani wajen kokarin gina mazaunin wannan makaranta.

Don haka muna kira ga al’umma su cigaba da bamu goyan baya da hadin kai ta hanyar taimakawa wannan makaranta, domin mu cimma wannan buri da muka sanya a gaba’’.

LEAVE A REPLY

Please enter your comment!
Please enter your name here