Ana CI Gaba Da Tattara Sakamakon Zaben Gwamna  A Kano

0
1156
JABIRU A HASSAN, Daga Kano.

A HALIN yanzu, ana ci gaba da tattara sakamakon zaben gwamna da na yan majalisar dokokin jihar kano tun  bayan gudanar da zaben jiya asabar kamar  yadda akayi a fadin  kasarnan.

Wakilin mu ya ruwaito cewa tun  a daren  jiya ne wasu  wadanda  basu da wata alaka  da hukumar zabe suke  bayyana sakamako iri daban-daban wanda  dole sai  da hukumar zabe mai zaman kanta a jihar  ta kano ta bada sanarwar cewa ita ce kadai ta ke da alhakin bayyana sakamakon zabe bisa  doka, tare da gargadin al’uma kan bayyana sakamako batare da fitar daga  hukumar zaben ba.

Haka kuma a daren  na jiya har wasu abokan hamayya sun fara gangamin murnar lashe zabe sakamakon yadda wasu suka rika bayyana sakamakon zabe marar  inganci lamarin da ya sa su Kansu hukumomin tsaro suka rika gargadin fitowa kan tituna domin murnar cin zabe.

Ya zuwa aiko da wannan labari, jami’an hukumar zabe mai zaman kanta watau INEC na yankunan kananan hukumomi suna ci  gaba da kai sakamakon zabukan gwamna da na yan majalisun dokokin da aka gudanar jiya asabar, wanda a cewar  hukumar zaben, sakamakon da ya fita  daga  gare ta shi ne sahihin sakamako ba wanda  kawai wasu suke  kirkira ba.

Mata a Layin zabe a rumfar zabe ta Zangon Mata dake Mazabar Ganduje.

LEAVE A REPLY

Please enter your comment!
Please enter your name here