Matasa Masu Tattaki Daga Kaduna Sun Isa Kano

0
1464

JABIRU A HASSAN, Daga  Kano.

MATASAN nan guda biyu da suka tashi daga  Kaduna zuwa kano a kafa watau Nazifi Abbas da  Muhammad Auwal Abdullahi sun isa  birnin kano da misalin karfe uku na yammacin wannan rana ta Laraba kamar yadda suka yi alwashi.

Da suke zantawa da wakilin mu na jihar Kano, Nazifi Abbas da Auwal Abdullahi sun bayyana cewa sun kuduri aniyar yin wannan tattaki ne domin nuna cikakken goyon bayan su ga dan takarar gwamnan jihar  ta kano a tutar jam’iyyar PDP, watau Injiniya Abba Kabir Yusuf da kuma jagoran kwankwasiyya na kasa, Sanata Rabiu Musa Kwankwaso da kuma dimokuradiyya.

Matasan sun kara da cewa tun  da suka bar Kaduna babu wata matsala da ta faru garesu, sannan sun yi tattaki cikin lumana da farin ciki matuka bisa  yadda al’uma suka rika tsayawa wajensu suna jinjina masu tareda tallafa masu da abinci da ruwan sha da sauran dawainiya irin ta kauna.

Bugu da kari, matasan sun sanar  da cewa sun isa kano ne  domin su bada tasu gudummawar ga jam’iyyar PDP domin ganin dan takarar ta Injiniya Abba Kabir Yusuf ya sami nasara a zaben da za’a kammala  ranar asabar mai zuwa idan Allah ya kai mu.

Ya zuwa aiko da wannan labari, dumbin matasa ne  suke  yin rakiya ga wadannan matasa masu tattaki daga  Kaduna zuwa Kano Inda ake ta jinjina masu da nuna  goyon bayan abin da suka yi.

LEAVE A REPLY

Please enter your comment!
Please enter your name here