Kungiyar RIFAN Tana Taimaka Mana-inji Manoman Shinkafa Na Jihar  Kano

0
605

JABIRU A HASSAN,Daga  Kano.

MANOMAN shinkafa a jihar Kano sun bayyana cewa kungiyar manoma shinkafa ta kasa wato RIFAN tana kokari wajen ganin noman  shinkafa a jihar  ya bunkasa bisa  manufofin gwamnatin tarayya na wadata kasa da abinci.

A cikin tattaunawar da wakilin mu  ya yi da wasu manyan manoman shinkafa a jihar ta Kano, sun sanar da cewa ko shakka babu, kafa kungiyar ta RIFAN ya yi amfani a fadin kasar nan baki  daya, kuma ana samun ci  gaba mai albarka wajen rubanya noman shinkafa da sarrafa ta a jihar Kano kamar  yadda ake gani.

Injiniya Sulaiman Sani, wani babban manomin shinkafa  a Kano ya shaida wa Gaskiya Ta Fi  Kwabo cewa kungiyar RIFAN tana kokari da gaske wajen tabbatar da ganin cewa  manoman shinkafa a fadin  jihar suna  amfana da dukkan wani shiri na gwamnatin tarayya da ya shafi harkar noman  shinkafa da sarrafa ta ba tare da samun wata  matsala  ba.

Sannan ya kara da cewa yanzu haka noman  shinkafa ya bunkasa rani da damina a jihar  kano musamman ganin yadda shugabannin kungiyar ta RIFAN suke  aiki dare da rana domin ganin kwalliya tana biyan kudin sabulu ta fuskar noman shinkafa da sarrafa ta har ma da kasuwancinta a jihar  cikin nasara.

Shi ma a nasa tsokacin, Alhaji Muktari Kadandani daga yankin karamar hukumar Makoda ya ce ko shakka babu, shugabannin kungiyar manoman shinkafa ta jihar  Kano sun ciri tuta bisa  kokarin da suke  yi na ganin cewa manoman shinkafa  jihar  Kano suna amfana da shirin tallafa wa manoma kamar  yadda ake  gani tun da aka fara shirin tallafa wa manoman shinkafa tsakanin babban bankin  Nijeriya wato CBN da kungiyar ta RIFAN.

Wakilinmu ya ruwaito cewa a shekara ta 2017,  manoma dubu 24 ne  suka amfana da shirin tallafa wa manoman shinkafa daga  yankuna 8, lokacin noman rani, kana manoma dubu 44 ne  suka amfana da tallafi a shekara ta 2018 da damina daga  yankuna 11, yayin da manoman shinkafa dubu 28 suka sami wannan tallafi a shekara ta 2019 da rani daga  yankuna 7 duk da dumbin kalubalen da ake fuskanta na aiwatar da shirin ba da tallafin daga wadanda ba su fahimci yadda tsarin yake  ba

LEAVE A REPLY

Please enter your comment!
Please enter your name here