An Kama Masu Garkuwa Da Mutane Su 5 A Yankin Toro  

0
450
Matasan da ake zargi da garkuwa da mutane da aka kama a yankin Toro

Isah Ahmed Daga Jos 

RUNDUNAR kungiyar tsaro ta Danga reshen  karamar hukumar Toro da ke jihar Bauci, ta sami nasarar kama wasu matasa guda 5, da suka addabi al’ummar yankin  da garkuwa da mutane. Shugaban kungiyar Alhaji Yusuf Abdullahi ne ya bayyana haka, lokacin da yake zantawa da wakilinmu a garin Magama Gumau.

Ya ce abin da yake faruwa ba ta gari sun dami  al’ummar wannan yanki, don haka  

a kullum ‘yan wannan kungiya suna  sanya idanu a wurare daban-daban a yankin, don kula da yadda mutane suke kaiwa da komawa.

Ya ce sakamakon haka ne suka gano wadannan matasa masu garkuwa da mutane. Kuma sun kama mutane 3 a  Gumau,   mutane  2  kuma sun kama su ne a wajen Zaranda.

Ya ce daya daga cikinsu ya bayyana masu cewa sun yi garkuwa da mutane sau 7. Kuma  ya bayyana masu cewa  har kanen babansa sun yi garkuwa da shi, sun karbi kudi naira dubu 700.

Ya ce wadannan masu garkuwa da mutane da suka kama su ne Shagari Ibrahim da  Alhassan Abdullahi da Ibrahim Sulaiman da Muhammadu Inuwa da kuma Isah Ibrahim.

Ya ce tuni sun mika wa rundunar ‘yan sandan jihar Bauci wadannan matasa da ake zargi da aikata garkuwa da mutane.

‘’Muna  kira ga gwamnati ta sanya ido kan wadanda muke kamawa, domin yawanci idan mun kama irin wadannan masu laifi, ana sako su. Wannan shi ne babbar damuwarmu domin idan aka kama mai aikata laifi irin wannan aka sake shi, ba tare da an hukunta shi ba, idan ya fito zai ci gaba da aikata irin wannan laifi’’.

Ya yi  kira ga iyayen kasa su kara sanya idanu kuma su ba su hadin kai, don kawo karshen wannan al’amari.

Wakilinmu ya yi kokarin kiran kakakin rundunar ‘yan sandan  jihar Bauci, DSP Kamal Datti domin jin ta bakinsa, kan wannan al’amari amma bai same shi ba.

 

LEAVE A REPLY

Please enter your comment!
Please enter your name here