Damuwa Ta Kashe Mutane 3 Yayin Da Gwamnatin Kaduna Ta Rushe Gidaje 100 A Zariya

0
236
Usman Nasidi, Daga Kaduna.
AKALLA mutum uku ne ake fargabar rai ya yi musu halinsa, yayin da Hukumar Tsare-Tsare da Ci gaba ta jihar Kaduna (KASUPDA), ta rushe fiye da gidaje 100 a Unguwar Barebari da ke karamar Hukumar Zariya ta jihar ta Kaduna.
A wani rahoto da Arewa Agenda ta wallafa ya bayyana yadda mutum uku suka yi gamo da ajali saboda shiga cikin tsananin damuwa da kuma tsabagen baƙin ciki.
Wasu daga cikin wadanda abin ya shafa yayin zantawa da manema labarai sun bayyana cewa, matakin da KASUPDA ta dauka bai biyo tafarkin dace ba kamar yadda shari’a tayi tanadi dangane da irin wannan lamari.
Mohammed Isa, daya daga cikin mutanen da aka rushewa gida ya ce: “A ranar 6 ga Yulin 2020 ne, Ma’aikatan KASUPDA sun fito ba zato ba tsammani kuma suka fara sanya alamar gidajen da zasu ruguje.”
“A ranar Talata 7 ga wata, mun samu rahoto daga wata majiya cewa KASUPDA na shirin dauko jami’an tsaro domin su zameta garkuwa yayin ruguje gidaje.”
“A yayin da suka bayyana da misalin karfe 9.00 na safe domin fara aiwatar da aikin na rusa, mutane suka tsaya kyam domin ganin hakan bai fary ba.”
“Shugaban KASUPDA ya bai wa jami’an tsaro umarnin su harbi duk wanda ya tsaya musu a kan hanya amma aka yi sa’a jagoran jami’an tsaron mutum ne mai fahimta.”
“Babban jami’in tsaron ya ce duk da an ba shi umarnin ya aiwatar da hakan, sai dai tausayi ba zai iya barin shi ya aikata hakan ba.”
“Sai kawai ya janye jami’ansa suka gabansu.”
“Ba tare da an yi aune ba, sun sake bayyana a da misalin karfe 12.05 na dare a ranar Laraba, inda suka kwantar da duk wasu gidaje da ke yankin kafin ketowar Al-Fijir.”

LEAVE A REPLY

Please enter your comment!
Please enter your name here