Kungiyar Peace Corps Ta Kai Wa Kwamandan Hisba Na Abuja Ziyara Neman Goyan Baya

0
408
Dokta Chinedu S. Nneji Kwamandan Kungiyar NUPENC na Kasa,

Isah Ahmed Daga  Jos

TAWAGAR shugabannin kungiyar  hada kan kasa ta Peace Corps [NUPENC] ta kai wa Limamin masallacin gidajen ‘yan majalisar tarayya da ke Abuja, kuma Kwamandan Hisba na Abuja, Imam Ibrahim Auwal Usama, ziyarar neman goyan baya. Tawagar shugabannin  kungiyar ta kai wannan ziraya ce, a ofishin Kwamandan da ke Abuja.

Da yake jawabi a wajen Kwamandan kungiyar na kasa, Dokta Chinedu S. Nneji ya bayyana cewa sun kawo wannan ziyara ce domin neman goyan baya tare da bayyana manufofin kungiyar.

Ya ce ganin limamin yana daya daga cikin limaman babban birnin tarayya Abuja, kuma Kwamandan Hisba na Abuja suka kawo mana wannan ziyara, don neman goyan baya.

Ya ce  kungiyar ta fuskanci kalubale na maganar kabilanci da bangaranci, domin wasu suna  kallon  kungiyar, kamar wata kungiya ce ta wani addini daban.

Kwamandan ya yi bayanin cewa wannan kungiya babu ruwanta da maganar banbancin addini ko kabila, don haka kowanne dan Najeriya yana da dama ya zo ya shiga cikinta.

‘’Muna  bai wa Imam tabbacin cewa za mu hada hannu da shi, don ganin mun yi aiki tare, don haka muna rokon ku taimaka wajen ganin majalisar tarayya ta amince da kudurin da aka gabatar mata,  kan kafa wannan kungiya’’.

A nasa jawabin   Limamin masallacin gidajen ‘yan majalisar tarayya da ke Abuja, kuma Kwamandan Hisba na Abuja Imam Ibrahim Awwal [Usama]   ya bayyana matukar farin cikinsa, kan wannan ziyara da kungiyar ta kawo masa.

Ya ce  yanzu sun gamsu da wannan kungiya kuma sun karbeta  hannu bibbiyu, don haka za su taimaka wajen ganin majalisar tarayya  ta amince da qudurin kafa kungiyar  da ke gaban majalisa.

 Ya yi kira ga al’ummar Najeriya musamman na arewa, su fito su shiga  kungiyar a tafi da su tare, kada su yi sakaci a tafi a bar su a baya.

LEAVE A REPLY

Please enter your comment!
Please enter your name here