Gwamna Buni Ya Kaddamar Da Sayar Da Takin Zamani Na 2022 Kan Naira Dubu 13 Kowane Buhu

0
108

Daga Sani Gazas Chinade, Damaturu.

GWAMNAN Jihar Yobe, Mai Mala Buni a ya kaddamar da sayar da takin zamani da rarraba taki ga manoma na shekarar  2022 da rangwamen da za a siyar da shi a kan Naira 13,000 kan kowanne buhu a wani bangare na kudirin farfado da aikin noma don wadatar abinci da samar da tsaro da karfafa tattalin arziki.

A yayin bikin sayar da takin zamani da aka gudanar a Damaturu babban birnin Jihar Yobe, Gwamna Mai Mala Buni da yake jawabi a wajen bikin, ya ce “Aikin noma shi ne babban abin da al’ummarmu ke da shi, don haka wannan gwamnati za ta ci gaba da baiwa fannin fifiko na musamman wanda ya cancanta, kuma ya dace da manufofin Gwamnatin Tarayya kan harkar noma a matsayin daya daga cikin muhimman sassa na tattalin arzikin kasarmu.

A cewarsa “Wannan gwamnatin ta dukufa wajen samar da ingantaccen tsarin da zai tallafa wa ‘yan kasar don samar da ayyukan yi, inganta dogaro da kai, da wadatar abinci da kuma ba da gudummawa ga manufofin noma na kasa don samun wadatar abinci a Najeriya”.

“Ina so in yaba wa mai girma shugaban kasa bisa tallafin hadin gwiwa da gwamnatin tarayya ta bayar na cibiyar bunkasa kiwon dabbobi ta Jakusko-Nasari da sauran tallafin noma da aka baiwa manoma da kiwo a fadin kasar nan”.

Ya kara da cewa, kamar yadda aka sani, Majalisar Dinkin Duniya ta yi gargadin cewa ana hasashen za a yi fama da karancin abinci saboda wasu dalilai na dan Adam da na yanayi. kana Najeriya na fama da kalubalen tsaro a wasu sassan kasar wanda zai iya shafar noman abinci. Don haka ya kamata a yi amfani da ingantaccen tsari a Jihar don bunkasa noman, da kuma yin noman ban ruwa.

“Gwamnatin Jiha tare da hadin gwiwar Bankin Duniya, Kungiyar Tarayyar Afirka (AU) da Gwamnatin Tarayya sun kammala aiwatar da shirin na tallafawa sauyin yanayi na tsawon shekaru 5 a watan Maris na wannan shekara kuma mun rigaya mun amince da ci gaba da gudanar da ayyukan noma. Shirin ya wuce tallafin haɗin gwiwa a Jiha kamar yadda aka tsara tun farko.”

Gwamna Mai Mala Buni ya ci gaba da cewa, suna gudanar da ayyukan da za a mayar da Naira biliyan 4 a asusun su don aiwatar da sabbin hanyoyin inganta karfin kananan manoma don dawo da filaye a tsakanin COVID-19 a Najeriya don samar da kashi 100 cikin 100 daga gwamnatin tarayya. 

Acewarsa, Kungiyar Tarayyar Afirka, a yanzu haka sun kammala shirye-shirye domin fara aikin, kana suna kuma hada kai da abokan huldar su da hukumomin tarayya da abin ya shafa domin kara habaka noman rani da kiwo a Jihar.

“Don mu ci gaba da samun nasarorin da muka samu wajen noman, mun bi tsarin samar da takin zamani ga manoma a farashi mai rahusa. Don haka na amince da Naira 13,000 a kan kowacce buhu na taki a sayar wa manomanmu. Ina kuma yin gargadin cewa gwamnati ba za ta lamunci duk wani aiki na karkatar da takin ba ko kuma zagon kasa ba.”

“Jami’an Gwamnati da aka dora wa alhakin siyar da kayayyakin da aka damka musu, dole ne su tabbatar da sayarwa da rarrabawa kananan hukumomi 17 cikin adalci.  Ina kuma kira ga dimbin manoman mu da su guji sake sayar da takin, amma su tabbatar da amfani da shi wajen noman su da kuma samun kudin shiga da ake sa ran za su samu. Mai girma kwamishinan ma’aikatar noma da albarkatun kasa ne zata bayar da cikakkun bayanai kan tsarin siyan takin da sauran kayan masarufi”.

Gwamnan ya kuma umarci ma’aikatar noma da albarkatun kasa da kwamitin gudanarwa kan farfado da aikin noma da kwamitin kula da shirin noman da su ci gaba da kokarinsu na bai daya domin kawo sauyi a harkar noma domin samun kyakkyawan sakamako a Jihar.

“Bari in yi amfani da wannan dama domin in bayyana godiyar gwamnati da mutanen Jihar Yobe ga Bankin Duniya, da Gwamnatin Tarayya, da Hukumar Raya Kasashen Afirka-Sabuwar Kawancen Ci Gaban Afirka (AUDA-NEPAD) da sauran abokan hadin gwiwa na ci gaban kasa. Ingantacciyar hadin gwiwa na jihar don cimma burin mu na noma.  Na lura da buƙatun da Kwamishinar ta yi kuma na amince da maye gurbin aikin IFAD tare da Cibiyar Koyar da Ayyukan Aikin Noma (CASTC), yayin da sauran buƙatun za a yi la’akari da su”.

“Ina kuma kira ga Sarakunan Gargajiyarmu, Kungiyar Manoman Najeriya ta Najeriya, Kungiyar Makiyaya ta Miyetti Allah, Kulen Allah Cattle Rearers Association of Nigeria, da shugabannin al’umma da jami’an tsaro da su karfafa zaman lafiya a tsakanin manoma da makiyaya a Jihar.  Ina kara nanata kirana ga al’ummar Jihar da su ci gaba da addu’o’in samun zaman lafiya da albarkar girbi da wadata”. Buni Ya ce

LEAVE A REPLY

Please enter your comment!
Please enter your name here